தீப்பாஞ்சி அம்மன்

தீப்பாஞ்சி அம்மன்:

 

நடுகல் வழிபாட்டில் ஓர் அம்சமாக விளங்குவது சதிகல் வழிபாடு ஆகும். நடுகல்லையும் சதிகல்லையும் நாட்டுப்புற மக்கள் வழிபட்டு வந்தனர். காலப்போக்கில் இவைகள் சிறுதெய்வ வழிபாடுகளாக மாறி இன்றும் நிலைத்து நிற்கின்றன.  கணவனது இறப்பினை அறிந்தவுடன், தீயில் இறங்கி தன் உயிர் மாய்த்துக்கொள்ளும் கற்புடைய பெண்களின் நினைவாக நடப்படும் கற்களே சதிகற்கள் எனப்பட்டன. இந்த சதி கற்கள், மாசதி கற்கள் எனவும் அழைக்கப்படுகிறது. இந்த வகையான சதி கற்கள் தமிழகமெங்கும் பரவலாக கண்டெடுக்கப்பட்டு வருகின்றன. இந்த சதி கற்களே தீப்பாய்ந்தாள் என்றும் தீப்பாஞ்சி அம்மன் என்றும் அழைக்கபடுகிறாள்.

       தமிழ் காப்பியங்களில் ஒன்றான மணிமேகலையில், பத்தினிப்பெண்களை, கணவனுடன் தீயில் விழுந்து இறப்பவர்களை (உடன்கட்டை ஏறுதல்) முதலாவதாகவும், கணவன் இறந்தவுடன் தனியே நெருப்பு மூட்டி அதில் விழுந்து இறப்பவர்கள் இரண்டாமவர்களாகவும் கணவன் இறந்தவுடன் தனது இறுதிக்காலம் வரை விதவை கோலத்தில், தான் நேசித்த கணவனுடன் அடுத்தப்பிறவியில் சேர்ந்து வாழ வேண்டும் என்று நோன்பு இருந்து உயிர் துறப்பவர்கள் மூன்றாவதாகவும் பிரிக்கப் படுத்தப்பட்டுள்ளனர்.

       சேர மன்னர்களில் புகழ்பெற்ற இமயவரம்பன் நெடுஞ்சேரலாதன் இறந்துபட்டவுடன் அவனது மனைவி நற்சோணை என்ற சோழர் குலப்பெண் அவனுடன் உடன்கட்டை ஏறுகிறாள். இமயவரம்பனின் மகனான சேரன் செங்குட்டுவன் தனது தாய்க்கு கோயில் எடுத்துச் சிறப்பிக்க இமயமலையிலிருந்து கல் கொண்டு வந்து கோவில் அமைக்கிறான். இந்த நற்சோணை அம்மன் சேரர்களின் குலதெய்வம் ஆகிறாள்.  சேரன் செங்குட்டுவனே, பத்தினி தெய்வமான கண்ணகி தெய்வமான, வருஷ நாட்டின் அருகே சுருளிமலையில் உள்ள மங்கலதேவி மலையில் கோயில் எழுப்பியவன் ஆவான். முதலாம் ராஜராஜ சோழன் மங்கலதேவி கோட்டத்திற்கு வந்து கண்ணகியின் சிறப்பை உணர்ந்து அக்கோயிலுக்குத் திருப்பணிகள் செய்துள்ளான். அத்துடன் அக்கோயிலில் இருந்து பிடிமண் எடுத்து வந்து தஞ்சாவூரில் கோயில் அமைத்தான். அதுவே சிங்கள நாச்சியார் கோயில் ஆகும். இந்த பெயர் காலப்போக்கில் மருவி செங்களாட்சி அம்மன் என்று இன்றும் விளங்கிவருகிறது.

       வேத காலத்திலும் உடன்கட்டை ஏறும் வழக்கம் இருந்துள்ளது என்பதை ரிக் வேதம் உணர்த்துகிறது. இவ்வேதத்தில் உடன்கட்டை ஏறும்போது சொல்லவேண்டிய மந்திரங்கள் (ரிக். 10.18.8: அத.28,3.1)  விளக்கப்பட்டுள்ளன.

       தருமபுரி மாவட்டத்தில், சமீபத்தில், தருமபுரிக்கு அடுத்த நல்லம்பள்ளியின் அருகே  கந்துகால்பட்டி என்ற கிராமத்தில் திறந்த வெளியில் இருந்த தீப்பாஞ்சி அம்மனுக்கு கோவில் கட்டி குடமுழுக்கு நடத்தப்பட்டது. இந்த கோவிலானது தாழ்த்தப்பட்ட சமூகத்தைச் சேர்ந்த பெண் ஒருத்தி கணவன் இறந்துபட்டவுடன் தீயில் தன் உயிரை மாய்த்துகொண்டதும் அவளையே தங்கள் குலதெய்வமாக கொண்டாடுவதாகவும் கூறுகின்றனர். இந்த பகுதியில் வாழும் சுமார் 23 கிராமத்தை சேர்ந்த மக்கள்  தீப்பாஞ்சி அம்மனை தங்கள் குலதெய்வமாக வழிபட்டு வருகின்றனர்.  

மொரப்பூரை அடுத்த நவலையிலும், அரூரை அடுத்த நாதியானூர் கிராமத்திலும், சதி கற்கள் தீப்பாஞ்சி அம்மன் (குண்டாயதம்மன்) களாக உள்ளன. 

நவலை  தீப்பாஞ்சி அம்மன் கோவில்